Türkiyə Superliqasının 8-ci turunun mərkəzi görüşündə turnir cədvəlində son sıralarda qərarlaşan "Fənərbağça” öz meydanında üçüncü pillədəki "Başakşəhər”lə qarşılaşıb.
Gərgin idman mübarizəsi şəraitində keçən matçda hesab açılmayıb. Beləliklə, son 3 oyunda qələbə qazana bilməyən "Fənərbağça” ev oyununda vacib xallar itirib.
Qonaq komanda isə xallarının sayını 15-ə çatdırıb və eyni xala malik "Kasımpaşa”nı top fərqinə görə qabaqlayaraq ikinci sıraya yüksəlib.
Bu gün keçirilən digər oyunlardan "Yeni Malatyaspor” - "Sivasspor” görüşü 4:4 hesabı ilə heç-heçə başa çatıb. Trabzonspor” isə səfərdə "Akhisarspor”u 3:1 hesabı ilə məğlub edib.
Hazırda "Qalatasaray” 18 xalla çempionatın vahid lideridir.
Tura "Konyaspor”-"Beşiktaş” matçı ilə yekun vurulacaq.
