Tütünçülüyə maraq artıb VİDEO

Dövlətin tütünçülüyə dəstəyindən ruhlanan Oğuzlu fermerlər bu il tütün əkini sahələrini iki dəfəyə qədər genişləndirməyi planlaşdırırlar. Artıq bu istiqamətdə bir sıra işlər görən fermerlərin məqsədi daha çox məhsul götürməkdir.

Oğuz rayonunda tütünçülüyə maraq artıb. Kəndlilər daha çox gəlir əldə etmək üçün tütün əkininə üstünlük verməyə başlayıblar.

Keçən il rayon üzrə əkilmiş 190 hektar sahədən 289 ton quru tütün əldə edən fermerlər bundan həvəslənərək, cari ildə 400 hektara yaxın sahədə tütün əkməyi planlaşdırırlar. Əgər aqrotexniki qaydalara əməl olunarsa, bu il 800-900 ton quru tütün məhsulu əldə etmək mümkün olacaq.

Dünya bazarında daha tez satılan məhsuldar "Virciniya" sortlu tütünün əkilməsi üçün hazırda bir sıra kəndlərdə istixanalar qurulub, toxum gətirilib, sahələrə təbii gübrə daşınıb və çubuqlar qırılıb.

Bu il Oğuz rayonunda tütünçüləri ən çox sevindirən Bucaq kəndində 30 tütünqurudan kameranın tikintisinə başlanmasıdır. May ayında istifadəyə veriləcək kameralar həftədə hər biri 10 ton olmaqla, 300 ton yaş tütün qəbul edə biləcək. Bu da tütünçülük işini xeyli asanlaşdırmaqla yanaşı, dünya standartlarına uyğun quru tütün istehsal etməyə də imkan verəcək.

Bu il rayonda tütünçülüyün inkişafı ilə 2500-3000 nəfərin işlə təmin olunacağı gözlənilir.