Narkotiklərin bir qismini "izi" itirmək üçün qəbirstanlıqda gizlətdilər – ƏMƏLİYYATIN DETALLARI VİDEO

İranlı narkotacirin sifarişini yerinə yetirənlər saxlanıldı.

Xezerxeber.az xəbər verir ki, Xırdalan şəhəri, Masazır, Novxanı, Saray və digər qəsəbə ərazilərdə narkotiklərin qanunsuz dövriyyəsinə qarşı əməliyyatlar keçirilib.

Əməliyyat Abşeron Rayon Polis İdarəsinin Narkotiklərlə Mübarizə Bölməsinin əməkdaşları tərəfindən həyata keçirilib. Daxili İşlər Nazirliyindən verilən xəbərə görə, tədbirlər zamanı paytaxt sakinləri Əvəz Alışov, Rövşən Qurbanov, əvvəllər məhkum olunmuşlar Hacıəli İmanov, Orxan Vəliyev, Təbriz Cəfərov və Sərdar Əsgərov saxlanılıblar. Onlardan, idarə etdikləri avtomobillərindən, paytaxt və Abşeron rayonun müxtəlif ünvanlardakı mənzillərində 5 kiloqrama yaxın heroin, marixuana, metamfetamin və psixotrop tərkibli həblər aşkar olunaraq götürülüb.

Araşdırma zamanı saxlanılan şəxslərin qeyri-qanuni yollarla İrandan ölkəmizə gətirilən narkotikləri satmaq məqsədi ilə əldə etdikləri müəyyən olunub. Qeyd edilib ki, saxlanılan şəxslər narkotiklərin bir qismini "izi" itirmək məqsədi ilə qəbirstanlıqda məzar daşlarının yanında gizlətməkdən belə çəkinməyiblər.

Faktla bağlı cinayət işləri başlanılıb, əməliyyat-istintaq tədbirləri davam etdirilir.

Xezerxeber.az mövzu ilə bağlı daha ətraflı videomaterialı təqdim edir.