BMT Baş Assambleyası kosmosda nüvə silahlanmasına qarşıdır

Mayın 6-da BMT Baş Assambleyası Rusiyanın Təhlükəsizlik Şurasında kosmosda silahlanma yarışının qarşısının alınmasını nəzərdə tutan qətnamə layihəsini bloklayan vetosunu müzakirə edib.

Xezerxeber.az BMT-nin saytına istinadla xəbər verir ki, Rusiyanın qətnamənin əleyhinə səs verməsi səbəbindən Təhlükəsizlik Şurası keçən ay lehinə 13 səs alan mətni qəbul edə bilməyib, Çin isə bitərəf qalıb. Qətnamə layihəsi ABŞ və Yaponiya tərəfindən irəli sürülüb və 60-dan çox ölkə tərəfindən dəstəklənib.

Baş Assambleyanın sədri Dennis Frensisin iştirakçılara müraciətində qeyd olunub ki, kosmosda kütləvi qırğın silahlarının yerləşdirilməsi ilə bağlı konsensus əldə olunmaması narahatlıq doğurur. O əlavə edib: “Kosmos ayrı-ayrı xalqlara aid deyil. Onun dinc və davamlı istifadəsi milli mənimsəməyə tabe deyil və bütün ölkələrin maraqları və mənafeyi naminə sülh və əməkdaşlıq yeri olmalıdır. Kosmosun hərbiləşdirilməsi çox narahatedici bir tendensiyadır. Bu, inamsızlığı və parçalanmanı daha da dərinləşdirməklə yanaşı, həm də qaçılmaz olaraq Yerdəki həyatı təhdid edir və fəlakətli nəticələrə səbəb ola bilər”.

Baş Assambleyanın sədri vurğulayıb ki, 1967-ci il Kosmos Müqaviləsi iştirakçı dövlətlərə Yer ətrafında orbitdə və ya kosmosun hər hansı başqa yerində nüvə silahı və ya hər hansı digər kütləvi qırğın silahları daşıyan kosmik gəmilər yerləşdirməyi, quraşdırmağı açıq şəkildə qadağan edir. O, bütün üzv dövlətləri BMT-nin həm Yerdə, həm də kosmosda nüvə silahlarının yayılmaması məqsədlərini qorumağa kömək etməyə çağırıb.

Müzakirələr 76/262 saylı qətnaməyə uyğun olaraq Baş Assambleyanın Təhlükəsizlik Şurasının vetoları ilə bağlı vəziyyətləri müzakirə etmək mandatının bir hissəsi kimi keçirilib. Veto BMT Təhlükəsizlik Şurasının beş daimi üzvü - Çin, Fransa, Rusiya, Böyük Britaniya və ABŞ-ın sahib olduğu unikal səsvermə hüququdur. Bu ölkələrdən hər hansı birinin qətnamənin əleyhinə səs verməsi həmin sənədin qəbulunu əngəlləyir.