Bakıda daha bir yol nəqliyyatın hərəkətinə bağlanıb. Söhbət Sabunçu ilə Binəqədi rayonunu birləşdirən yoldan gedir. Təmir işləri ilə əlaqədar burada hərəkət 3 gün məhdudlaşdırılacaq.
Xüsusən də payız qış aylarında, yağışdan sonra keçilməz vəziyyətdə olan yol təmir edilir. Yolda köhnə asfalt qatı qaşınaraq yenisi vurulur.
Bu gündən etibarən paytaxtın Sabunçu rayonu ilə Binəqədi rayonu arasındakı yol təmirə bağlanıb. Təmir işlərinə Balaxanı qəsəbəsindən start verilib. ''Azəravtayol'' ASC-nin iş icraçısının sözlərinə görə, yolun bəzi hissələrində təxminən bir metrə qədər genişləndirimə də olacaq.
Yolun təmirə dayanması ərazidə yaşayanların da ürəyincədi. Amma onlar yolda təhlükəsizliyi qorumaq üçün bütün nişanların qoyulmasını da tələb edirlər.
İş icraçısının sözlərinə görə, asfalt qatı vurulub
qutardıqdan sonra yolda cizgi xətləri, piyada zolağı və nişanlar
quraşdırılacaq. Aparılan təmir işləri ilə əlaqədar olaraq Balaxanı qəsəbəsinin
mərkəzindən Binəqədi yolunun başlanğıcına kimi avtonəqliyyat vasitələrinin hərəkəti
3 gün müddətində bağlı olacaq. ''Azəravtayol'' ASC-nin əməkdaşları bu günlərdə
sürücülərdən alternativ yol kimi Zabrat avtomobil yolu və Ziya Bünyadov
prospektindən istifadə etmələrini tövsiyə edir.