Ucarda ana və körpəsi niyə öldü? Təfərrüat

"Qohum-əqraba hamısı yığılıb, ona qan verdi..."

Ucarda doğuş zamanı ana və körpəsinin ölümü ilə nəticələnən hadisənin təfərrüatı məlum olub.

Rayonun Lək kənd sakinlərinin AzNews.az-a verdiyi məlumata görə, Aynur Abbasovanın ölümünə səbəb, qanının zəhərlənməsi olub:

"Aynurun ilk hamiləliyi olub. Ailə qurandan 3 il keçsə də övladı yox idi. 14 gün bundan əvvəl müayinə olunmaq üçün Bakıya gedib. Müayinə zamanı həkimlər ona bətnindəki körpəsinin öldüyünü və qanının zəhərləndiyini deyiblər. Aynur fevral ayının 13-də əməliyyat olunub, körpə bətnindən çıxarılıb. 10 gün xəstəxanada qalıb. Qohum-əqraba hamısı yığılıb, ona qan verdi. Amma təəssüf ki, bunun faydası olmadı. Qanını təmizləyə bilmədilər”.

Qeyd edək ki, Ucar rayonunda ana və körpə ölümü baş verib. Rayonun Lək kənd sakini, 1984-cü il təvəllüdlü Aynur Abbasova Bakıdakı xəstəxanaların birində qeysəriyyə əməliyyatı zamanı körpənin ana bətnində öldüyü məlum olub. Əməliyyatdan bir neçə gün sonra A.Abbasova xəstəxanada dünyasını dəyişib.