Türkiyənin hazırki
rəhbəri Rəcəb Tayyib Ərdoğan və onun sədri olduğu hakim Ədalət və
İnkişaf Partiyası (AKP) ötən gün keçirilən növbədənkənar prezident və
parlament seçkilərində qələbə qazanıb.
Türkiyənin Ali Seçki Komissiyasının (ASK) sədri Sədi Güvən bildirib ki,
ölkə üzrə 59.354.840 seçicinin 87 faizdən çoxu səsvermədə iştirak edib.
Seçicilərin 52.6 faizi prezidentliyə namizəd Ərdoğana səs
verib. CHP-nin namizədi Məhərrəm İncə isə seçicilərin 30 faizinin səsi
ilə ikinci yerdə qərar tutub.
Parlament seçkilərinə keçirilən
səsvermədə Ədalət və İnkişaf Partiyası ilə Millətçi Hərəkat Partiyasının
birləşdiyi Cümhur İttifaqı birinci yeri qazanıb. Parlamentdəki 600
mandatın 293-ünü AKP qazanıb. 146 mandat Cümhuriyyət Xalq Partiyasının,
67 Xalqların Demokratik Partiyasının (HDP), 49 Millətçi Hərəkat
Partiyasının, 45 mandat isə İYİ Partiyanın payına düşüb.