Altı ay əvvəl uğurla keçirilmiş antiterror tədbirlərindən danışan Prezident İlham Əliyev bildirib ki, Azərbaycan öz yolundan dönməyəcək. Ermənistanın arxasında istənilən qüvvələr dursalar belə, Azərbaycan öz istəyinə nail olacaq. Dövlət başçısı əlavə edib ki, İkinci Qarabağ müharibəsinin nəticələri Ermənistana dərs olmadı. Əgər dərs olsaydı, antiterror tədbirlərinin keçirilməsinə ehtiyac qalmazdı.
Ölkənin iqtisadi inkişafa və müstəqilliyə nail olduğunu, bu gün heç kimdən asılı olmadığını bildirən dövlət başçısı, bunun sayəsində siyasi müstəvidə öz siyasətini müstəqil şəkildə apardığını qeyd edib. ''Bu gün Azərbaycan dünya miqyasında nadir ölkələrdəndir ki, onun siyasəti tamamilə müstəqildir, ancaq və ancaq Azərbaycan xalqının maraqlarına, iradəsinə əsaslanır'', - deyə dövlət başçısı əlavə edib.
Separatçıların məskunlaşdığı meydan və binadan da danışan prezident bildirib ki, bu meydanda Azərbaycan xalqına qarşı çirkin planlar hazırlanıb. Məhz bu binada Xocalı soyqırımının törədilməsi üçün əmrlər verilib.
Prezident İlham Əliyev Xankəndinin tarixi əhəmiyyətindən də danışaraq bildirib ki, bura qədim Azərbaycan torpağıdır. Azərbaycanın özünün ədaləti bərpa etdiyini, torpaqlarını işğalçılardan azad etdiyini, öz gücünü göstərdiyini vurğulayan dövlət başçısı bundan sonra hər kəsin bizimlə hesablaşmalı olduğunu, əks təqdirdə peşman olacağını bildirib.
Xezerxeber.az daha ətraflı videomaterialı təqdim edir.