Bakıda ağaclar yuyulur, yaşıllıqlara qulluq göstərilir

Ölkə başçısının tapşırıqlarına uyğun olaraq, Bakı Şəhər və paytaxt rayonları icra hakimiyyətləri tərəfindən Bakıda yeni yaşıllıq zolaqlarının salınması, ekoloji tarazlığın bərpası və ətraf mühitin mühafizəsi istiqamətində işlər davam etdirilir. Yaz əkin mövsümü ilə əlaqədar bu işlər daha da genişləndirilib.

Bakı Şəhər İcra Hakimiyyətinin mətbuat xidmətindən xezerxeber.az-a bildirilib ki, bayram günləri olmasına baxmayaraq, Bakı Şəhər Yaşıllaşdırma Təsərrüfatı Birliyinin və digər kommunal xidmətlərin əməkdaşları tərəfindən mövcud karantin rejiminin tələbləri çərçivəsində Abşeronun iqliminə uyğun yeni ağaclar, kollar əkilir, mövcud ağaclara və yaşıllıq sahələrinə aqrotexniki qulluq göstərilir, təbii gübrələr verilir. Əsas magistral yol və prospektlərin kənarlarındakı ağacların üzərinə toplanan toz və torpaq yuyulur, onların dibi yumşaldılır, təbii gübrə verilir. Həmçinin ağacların qurumuş budaqları budanır, yaşıllıq zolaqları və parklarda qazon örtüyü yenilənir.

Parklarda, prospekt və küçələrin kənarlarında yeni mövsümi güllər və kollar əkilir, şəhərə yeni gözəllik verilir. Görülən işlər çərçivəsində mərkəzi küçələrdə xüsusi rəng çalarlarına malik olan və Bakı şəhərində yaşıllıq sahəsində yeni rənglərin yaranmasına səbəb olacaq yeni növ Hind yasəmənləri əkilir.

Ağacların yuyulması ilə yanaşı, kommunal xidmətlərin avtonəqliyyat vasitələri və əməkdaşları tərəfindən prospekt və küçələrin, səkilərin kənarlarının, bordürlərin və buradakı işıq dirəklərinin, yol kənarındakı müxtəlif məhəccərlərin yuyulması həyata keçirilir.

Bu kimi aksiyalar mövsümün sonunadək paytaxtın bütün rayonlarında keçiriləcək.