Avstraliyanın abc.net.au portalı Azərbaycanın qələbəsindən yazıb.
Xezerxeber.az məlumat verir ki, məqalə Azərbaycan Prezidenti, Ali Baş Komandan İlham Əliyevin sözləri ilə başlayır: "Bizim hamımızın bir arzusu var idi, onu həyata keçirdik”.
Dövlətimizin başçısından gətirilən növbəti sitatda isə deyilir: "Biz həm döyüş meydanında, həm də siyasi arenada qəlbə qazandıq, bu qələbə ölkəmiz üçün yeni dövr açır. Bu inkişaf, təhlükəsizlik və tərəqqi dövrü olacaq”.
Məqalədə deyilir ki, sülh razılaşması Azərbaycanda böyük qəlbə sevinci kimi qarşılansa da, Ermənistanda kütləvi iğtişaşlara səbəb olub. Küçələrə çıxan on minlərlə insan baş nazir Nikol Paşinyanın istefasını tələb edib. Həmçinin Ermənistan ordusunun dekabrın 1-də Laçın rayonu ərazisindən də çıxdığıda qeyd olunub.
Sülhməramlıların həmçinin Dağlıq Qarabağı Ermənistanla birləşdirən Laçın dəhlizinə nəzarət etdiyi, Azərbaycanın müttəfiqi olan Türkiyənin isə Rusiya ilə birlikdə sülh razılaşmasının icrasına nəzarət edən monitorinq mərkəzinə qatılacağı da bildirilib.
Dövlətimizin başçısına istinadla bildirilir ki, döyüşlər nəticəsində Azərbaycan tərəfindən 94 mülki şəxs həlak olub, 400-dən çox isə yaralı var.
Yazıda döyüş əməliyyatları başa çatdıqdan sonra məcburi köçkünlərin də doğma yurdlarına qayıtmasından bəhs olunur.
Bildirilir ki, 26 il əvvəl Kəlbəcər və Ağdan rayonlarını tərk etməyə məcbur olmuş azərbaycanlılar artıq öz doğma yurdlarına qayıtmağa başlayıblar.
Nərmin Məcidli