“Azərbaycan Qarabağ məsələsində İslam Ümmətinə güvənir”
– Məmmədyarov
Gündəm
|
11:25 • 20 Sentyabr 2017
Azərbaycanın xarici işlər naziri
Elmar Məmmədyarov İslam Əməkdaşlıq Təşkilatının Ermənistanın Azərbaycan
Respublikasına qarşı təcavüzü ilə bağlı Kontakt Qrupunun Nyu-Yorkda
keçirilən ikinci iclasında çıxış edib.
Azərbaycan XİN-dən XəzərXəbər-ə verilən məlumata görə, E.Məmmədyarov İƏT-in baş katibliyinə İƏT-in Ermənistan Respublikasının Azərbaycan
Respublikasına qarşı təcavüzü üzrə Kontakt Qrupun ikinci iclasını
təşkil etdiyi üçün təşəkkür edib: "Çox təəssüf hissi ilə bildirirəm ki,
Kontakt qrupunun sonuncu görüşündən sonra Azərbaycan Respublikasının işğal olunmuş Dağlıq Qarabağ
və ətraf ərazilərində münaqişənin tənzimlənməsi istiqamətində vəziyyət
nəinki dəyişməz qalır, hətta cəbhə xəttində toqquşmaların
intensivləşməsi və cəbhə xəttinə yaxın ərazilərdə yaşayan mülki Azərbaycan əhalisinin qəsdən öldürməsi halları daha da artıb.
Məlum olduğu kimi, Ermənistanın Azərbaycana qarşı davam edən təcavüzü nəticəsində Azərbaycan əraziləri, Dağlıq Qarabağ
daxil olmaqla yeddi ətraf rayon işğal edilib, on minlərlə insan
həyatını itirib, 1 milyondan çox azərbaycanlı öz ev və mülkiyyətlərindən
didərgin olub, minlərlə insan itkin düşüb.
Ermənistanın
təcavüzü gedişində beynəlxalq humanitar hüququn pozulması ilə müşayiət
olunan müharibə cinayətləri, insanlığa qarşı cinayət və soyqırım aktları
törədilib. Bu il erməni qoşunları tərəfindən Azərbaycanın işğal olunmuş Dağlıq Qarabağ bölgəsində yerləşən Xocalı şəhərinin dinc əhalisinə qarşı törədilən vəhşilik cinayətlərinin iyirminci ildönümünüdür. 1992-ci ilin fevralında Xocalının
işğalı nəticəsində yüzlərlə azərbaycanlı, o cümlədən qadınlar, uşaqlar
və yaşlılar öldürülüb, yaralanıb və ya girov götürülüb, şəhər isə yerlə
yeksan edilib.
Bu fürsətdən istifadə edərək, İƏT-in bütün üzvlərinə Abican şəhərində
İƏT-ə üzv ölkələrin Xarici İşlər Nazirləri Şurasının 44-cü sessiyasında
qəbul edilmiş "1992-ci il Xocalı
qırğınının qurbanları ilə həmrəylik" başlıqlı qətnaməni dəstəklədikləri
üçün minnətdarlığımı ifadə etmək istərdim. İƏT-ə üzv dövlətlərini Xocalı şəhəri və digər işğal olunmuş Azərbaycan
ərazilərində törədilmiş müharibə cinayətləri, insanlığa qarşı
cinayətlər və soyqırım aktlarının milli və beynəlxalq səviyyədə
tanınması üçün səy göstərməyə çağırıram.
1993-cü ildə qəbul edilmiş Birləşmiş Millətlər Təşkilatının
Təhlükəsizlik Şurasının 822 (1993), 853 (1993), 874 (1993) və 884 (1993)
qətnamələri Azərbaycanın
ərazi bütövlüyünü birmənalı şəkildə təsbit edir və işğalçı qüvvələrin
bütün işğal olunmuş ərazilərdən qeyd-şərtsiz çıxarılmasını tələb edir. Ermənistanın ərazi iddialarına və zorakı hərəkətlərə cavab olaraq, Təhlükəsizlik Şurası Dağlıq Qarabağ bölgəsinin Azərbaycanın ayrılmaz hissəsi olduğunu bir daha təsdiqləyir.
Təəssüf ki, Təhlükəsizlik Şurasının əsas tələbləri hələ də yerinə yetirilməyib və 20 ildən artıq müddət ərzində ATƏT çərçivəsində aparılan vasitəçilik səyləri hələ nəticə verməyib.
Atəşkəs rejiminin yaradılmasına baxmayaraq, Ermənistan və Azərbaycan silahlı qüvvələrinin təmas xəttində və iki dövlət arasında sərhəd boyunca yerləşən Azərbaycanın şəhər və kəndlərinə Azərbaycan
hərbi qulluqçuları və vətəndaşlarının öldürməsi və yaralanması ilə
nəticələnən hücumlar zorakı xarakter daşıyır və son vaxtlar daha da
intensivləşib.
İyul ayının 4-də Ermənistan silahlı qüvvələrinin Azərbaycanın Füzuli rayonun Alxanlı
kəndinin hədəflənmiş şəkildə və qəsdən atəşə tutması nəticəsində biri
uşaq olmaqla, iki mülki şəxs həlak olub, bir nəfər isə ağır yaralanıb.. Ermənistan silahlı qüvvələri tərəfindən Ermənistan-Azərbaycan sərhədi boyunca 7 avqust tarixində törədilmiş daha bir təxribat nəticəsində Tovuz rayonunun 13 yaşlı sakini yaralanıb. Bunlar hamısı Cenevrə Konvensiyaları üzrə öhdəliklərin Ermənistan tərəfindən kobud və sistematik şəkildə pozulduğunu təsdiqləyir.
Burada Ermənistan Respublikasının Azərbaycan
Respublikasına qarşı təcavüzü ilə bağlı İƏT-in müvafiq qətnamə və
qərarlarının tələblərini xatırlatmaq istərdim ki, bu da bütün üzv
dövlətləri münaqişənin gərginləşməsinə, Ermənistanı Azərbaycan
torpaqlarının işğalının davam etdirilməsinə köməklik edəcək hər hansı
bir silah və hərbi avadanlıqla təchiz etməkdən çəkinməyə və bu cür
avadanlıqların daşınması üçün öz ərazilərindən tranzit məqsədilə
istifadə edilməsində imkan verməməyə çağırır.
Bu qətnamələrin üzv dövlətlərə təcili çağırışına toxunaraq bildirmək istərdim ki, Ermənistanın təcavüzünə son qoymaq üçün lazımi siyasi və iqtisadi tədbirlər həyata keçirilməli, o cümlədən, iqtisadi fəaliyyət və Ermənistan Respublikasına investisiya qoyulmasından çəkinməklə yanaşı Ermənistanla ümumi əməkdaşlıq məhdudlaşdırılmalıdır.
Ərazilərinin işğalından və yüz minlərlə vətəndaşının zorla didərgin salınmasından əziyyət çəkən bir ölkə kimi, Azərbaycan münaqişənin bütün bölgənin tam inkişafını, sülh və ədaləti təmin edəcək siyasi həllində ən çox maraqlı olan tərəfdir. Azərbaycan öz ərazi bütövlüyünü və vətəndaşlarının hüquq və azadlıqlarını heç vaxt güzəştə getməyəcəkdir. Ermənistan
anlamalıdır ki, suveren dövlətin ərazilərinin hərbi işğalı və etnik
təmizləmə siyasətinin aparılması həll yolu deyil və heç bir siyasi
nəticə verməyəcəkdir.
Sülh, təhlükəsizlik və sabitliyə nail olmaq üçün Ermənistan qoşunları Azərbaycanın işğal edilmiş Dağlıq Qarabağ
regionu və ətraf ərazilərindən tam, dərhal və qeyd-şərtsiz çıxarılmalı,
ölkəmizin suverenliyi və ərazi bütövlüyü bərpa edilməli və azərbaycanlı
məcburi köçkünlərın öz torpaqlarına qayıtmaq hüququ təmin edilməlidir.
Azərbaycan Respublikası Azərbaycanın suverenliyi və ərazi bütövlüyünə qarşı gücdən qanunsuz istifadə və Azərbaycan ərazilərinin işğalının qəti pislənilməsinə dair İƏT-in ədalətli və prinsipial mövqeyi əsasında İslam Ümmətinin davamlı həmrəyliyinə güvənir.
İnanırıq ki, Kontakt Qrupu çərçivəsində müzakirələr Ermənistan Respublikasının Azərbaycan
Respublikasına qarşı təcavüzünü qınayan İƏT sənədlərinin həyata
keçirilməsinə və İƏT üzv dövlətlərinin fərdi və birgə səylərin bu
baxımdan əlaqələndirilməsinə öz töhfəsini verəcək".