Xəzər Xəbər

Yeni dələduzluq fəndi: Sayğac quraşdırmamaq üçün pul alıb, saxta qəbz verdilər

Hadisə | 15:47 • 21 Sentyabr 2022
Yeni dələduzluq fəndi: Sayğac quraşdırmamaq üçün pul alıb, saxta qəbz verdilər

Bakının Nəsimi rayonunda “Azərsu” ASC-nin abonentinə qarşı dələduzluq faktı aşkarlanıb.

Bu barədə XəzərXəbər-ə “Azərsu” ASC-dən məlumat verilib.

Məlumata görə, özlərini Elnur və Namiq kimi təqdim edən şəxslər 20 Yanvar küçəsi, 25, mənzil 15 ünvanında yaşayan abonentdən 10 il müddətində yaşadığı ünvana sayğac quraşdırılmaması müqabilində 50 manat alıblar. Həmin şəxslər vətəndaşı bu qanunsuz əmələ inandırmaq üçün  ona Rüstəmov Namiq Ruslan oğlunun adına olan kassa mədaxil qəbzi də təqdim ediblər. Verilmiş qəbzin üzərində vətəndaşın yaşadığı ünvan deyil, 133-cü bina, 5-ci mənzil göstərilib. Qəbzin arxa hissəsində 10 il ərzində sayğacın quraşdırılmayacağı barədə qeyd də yazılıb.

“Bu hallar tamamilə qanunaziddir, hər hansı ödənişin müqabilində sayğacın quraşdırılmaması kimi xidmət mövcud deyil. Bir daha abonentlərin diqqətinə çatdırırıq ki, mənzillərə yaxınlaşan və özünü “Azərsu” əməkdaşı kimi təqdim edən şəxslərdən mütləq qaydada xidməti vəsiqə tələb etsinlər. Xidməti vəsiqə təqdim etməyənlərin tələblərini yerinə yetirməsinlər və suallarını cavablandırmasınlar. Belə qeyri-qanuni əməllərlə rastlaşdıqda və şübhə doğuran hallarla qarşılaşdıqda dərhal “955” Zəng Mərkəzinə məlumat versinlər.

Abonentlərdən xahiş olunur ki, yaşadıqları ünvana yaxınlaşan “Azərsu” ASC-nin əməkdaşları da daxil olmaqla heç kimə nağd pul ödəməsinlər, içməli və tullantı su xidmətlərindən istifadəyə görə ödənişləri internetlə (azersu.az saytı, e-su.az portalı, müxtəlif ödəmə saytları), bank, poçt şöbələri, həmçinin ödəmə terminalları vasitəsilə həyata keçirsinlər", - deyə səhmdar cəmiyyəti bəyan edib.

Xəbər lenti

Çox oxunanlar