Çinin Hunan əyalətində leysan yağışları 11 nəfərin həyatına son qoyub

Çinin cənub-şərqində yerləşən Hunan əyalətində İyulun 6-dan başlayan leysan yağışları 11 nəfərin həyatına son qoyub, 6 nəfər isə itkin düşüb.

ÇXR Daşqın və Quraqlıqla Mübarizə üzrə Dövlət Qərargahı tərəfindən yayılan məlumata görə, təbii fəlakət zonası 10 şəhəri, 76 əyalət və qəzanı, ümumilikdə 2,8 milyon insanı əhatə edir. Ölkəyə dəyən birbaşa iqtisadi zərər 5,3 milyard yuan (781 milyon dollara yaxın) həcmində qiymətləndirilir.

Hakimiyyət təbii fəlakət zonasından 257 min insanı təxliyə edib. Yüz mindən çox insanın isə təcili yardıma ehtiyacı var.

Davam edən leysan yağışları aqrar sektora da ciddi zərər vurub. 187 min hektardan çox kənd təsərrüfatı sahəsi su altında qalıb. Məcrasından çıxan çaylar yolları və 2 mindən artıq evi dağıdıb, 2 mindən çox binanı ciddi, 8 minə yaxın tikilini isə qismən zədələyib.