BƏƏ-nin hərbi peyki olan daşıyıcı raketin buraxılışı uğursuz olub

xFransa Qvianasındakı Kuru Kosmodromunda içərisində Birləşmiş Ərəb Əmirliklərinə (BƏƏ) məxsus "Falcon Eye 1” hərbi peyki olan "Vega” tipli yüngül daşıyıcı raketin buraxılışı uğursuz olub.

AZƏRTAC Əmirliklərin "The National” nəşrinə istinadla xəbər verir ki, yerli vaxtla saat 6.00-da startdan iki dəqiqə sonra daşıyıcı raketdə ciddi nasazlıq yaranıb. Raket əvvəlcədən təyin olunmuş trayektoriyadan meyl etməyə başlayıb və dispetçer xidməti raketlə "telemetrik rabitə”ni itirib.

"Arianespace” şirkətinin icraçı vitse-prezidenti Yus Fabriget kəşfiyyat peykinin itirilməsinə görə BƏƏ-dən üzr istəyib və raketin uçuşu barədə texniki informasiyanın ilkin təhlilindən sonra hadisə barədə tezliklə daha ətraflı məlumat veriləcəyini vəd edib.

"Falcon Eye 1” peyki növbəti 10 il ərzində Yer kürəsinin orbitində olmalı, hərbi və mülki məqsədlərlə istifadə edilmək üçün bütün dünya üzrə toplanan yüksək dəqiqlikli təsvirləri göndərməli idi. Raketin buraxılması əvvəlcə iyulun 5-dən 6-na gecəyə planlaşdırılmışdı, lakin güclü küləklər səbəbindən raketin buraxılışı bazar gününə, iyulun 7-nə keçirilmişdi.

"Falcon Eye 1” peyki vasitəsilə alınan təsvirlərdən xəritəçəkmə, kənd təsərrüfatının monitorinqi, şəhərlərin planlaşdırılması, təbii fəlakətlərin profilaktikası və onların idarə edilməsi üçün istifadə olunmalı idi. Bu təsvirlər həm də ətraf mühitdə baş verən dəyişikliklərin, o cümlədən səhralaşmanın öyrənilməsi, BƏƏ sərhədlərinin və sahilyanı ərazilərin monitorinqi üçün nəzərdə tutulurdu.