ÜST: AstraZeneca ilə vaksinasiya və tromboz arasında əlaqə mümkündür, lakin...

AstraZeneca preparatı ilə vaksinasiya və trombların əmələ gəlməsi arasındakı əlaqə mümkündür, lakin hələ təsdiqlənməyib.

Xezerxeber.az BMT-nin Xəbərlər xidmətinə istinadla xəbər verir ki, ÜST-nin peyvənd təhlükəsizliyi üzrə Qlobal məşvərət komitəsinin ekspertləri, Avropa dərman Agentliyi və Britaniya dərman dövriyyəsinə nəzarət İdarəsindən daxil olan son məlumatları araşdıraraq bu qənaətə gəliblər.

ÜST mütəxəssisləri vurğulayırlar ki, vaksinasiyadan sonra trombların əmələ gəlməsi, əlbəttə ki, narahatlıq doğurur, lakin bu, çox nadir haldır. Söhbət 200 milyon peyvənd olunanlar arasında onlarca hadisədən gedir. Eyni zamanda, ekspertlər xatırladırlar ki, 2,6 milyon insan COVID-19 xəstəliyi nəticəsində həyatını dəyişib.

"COVID-19 xəstəliyindən ölüm riski və infeksiyaların qarşısının alınmasında və ölüm hallarının azaldılmasında vaksinlərin potensialı nəzərə alınmaqla immunlaşmadan sonra nadir yan təsirləri qiymətləndirmək lazımdır", – deyə vaksinlərin təhlükəsizliyi üzrə ÜST-nin Qlobal məşvərət komitəsinin üzvlərinin görüşünün yekunlarına dair rəsmi bəyanatda deyilir.

Ekspertlər bildirirlər ki, onlar AstraZeneca preparatı ilə vaksinasiya barədə məlumat toplamağa davam edəcəklər. "Vaksinasiya ilə mümkün risk amilləri arasında potensial əlaqənin tam başa düşülməsi üçün ixtisaslaşdırılmış tədqiqatlar lazımdır", – deyə ÜST vurğulayır.

Mütəxəssislərin xatırlatdığı kimi, koronavirusa qarşı vaksinlərdən sonra yan təsirlər mümkün haldır. Onların əksəriyyəti peyvənd olunanlara əhəmiyyətli narahatlıq vermir və onların sağlamlığına təhlükə yaratmır.