Səngəçal-Çeyildağ yolu yenidən qurulur

Bakının Qaradağ rayonu ərazisindəki Səngəçal-Çeyildağ avtomobil yolu yenidən qurulur.

Avtomobil Yolları Dövlət Agentliyinin mətbuat xidmətindən XəzərXəbər-ə  bildirilib ki, 24 kilometr uzunluğa malik Səngəçal-Çeyildağ avtomobil yolu 2 hərəkət zolaqlı olmaqla IV texniki dərəcəyə uyğun inşa edilir.

Layihəyə görə, yolun hərəkət hissəsi 6 metr, çiyinlərin eni isə 2 metr nəzərdə tutulub. Yenidənqurma işlərinə uyğun olaraq yol yatağının yararsız qruntu qazılaraq çıxarılır, dolğu işləri aparılaraq 52 min kubmetr həcmdə yeni yol yatağı inşa olunur. Artıq yolun 4 kilometrlik hissəsində yeni yatağın inşası yekunlaşdırılıb.

Bundan başqa, yolun normativ eninin alınması məqsədilə torpaq yatağının genişləndirilməsi və dağ yamaclarının kəsilməsi işləri də aparılır. Həmin işlərə paralel olaraq 20 santimetr hündürlükdə yol əsasının alt layı da tikilir, 2 kilometrlik hissədə bu işlər artıq başa çatıb. Bunun ardınca isə 15 santimetr hündürlükdə əsasın üst layının tikintisinə başlanılacaq. Əsasın alt və üst layının tikintisi 100 min kubmetrdən artıq həcmdə icra olunacaq.

Qeyd olunub ki, layihə boyu 38 ədəd müxtəlif diametrli suötürücü boru yerləşir. Lakin borular köhnəldiyindən bəzilərinin sökülərək yenidən tikilməsinə, bir hissəsinin isə təmir olunaraq işlək vəziyyətinə salınmasına zərurət yaranıb. Artıq bu çərçivədə 3 boru təmir olunub, 700 mm diametrli 1 köhnə boru isə sökülərək yerində 1250 millimetr diametrli yeni dəmir-beton boru tikilib. Eyni zamanda, yolboyu yeraltı kommunikasiya xətlərinin yolun altından keçirilməsi üçün keçid boruların inşası aparılır.

Torpaq işləri tam olaraq bitəndən sonra texnoloji ardıcıllığa uyğun olaraq yolun asfaltlanması işlərinə başlanılacaq, yola alt və üst lay olmaqla 12 santimetr qalınlığında yeni asfalt-beton örtüyü döşənəcək. Asfalt-beton örtüyün eni 7 metr nəzərə alınmaqla bu işlər yolun 150 min kvadratmetrdən çox sahəsində aparılacaq. Bütün işlər mövcud tikinti və norma qaydalarına uyğun şəkildə yüksək keyfiyyətlə görülür. Bunun üçün əraziyə lazımi sayda canlı qüvvə və texnika cəlb edilib.

Layihə işlərinin sonuncu mərhələsində yolboyu zəruri olan yerlərdə yol nişanları quraşdırılacaq, yolun üfüqi nişanlanma xətləri çəkiləcək. Yolun yenidən qurularaq payız aylarında vətəndaşların istifadəsinə verilməsi planlaşdırılır.