"Bu qərarda qeyri-adi nəsə axtarmağa ehtiyac yoxdur" YAP sədrinin müavini

YAP-dan olan deputatların geri çağırılması ilə bağlı qərarın qəbul edilməsindən sonra YAP-ın Milli Məclisdəki deputat korpusu iclas keçirib. İclas zamanı deputatlar yekdilliklə bu qərarın lehinə çıxış ediblər. Deputatların səfərdə olanlarını çıxmaqla əksəriyyəti müraciəti imzalayıb.

XəzərXəbər-in məlumatına görə, bunu Yeni Azərbaycan Partiyasının qərargahında partiya sədrinin müavini-icra katibi Əli Əhmədov deyib.

O, bildirib ki, böyük ehtimalla müraciət Milli Məclisə daxil olub və parlamentin yaxın zamanlarda keçirilməsi planlaşdırılan iclasında müzkairəyə çıxaracaq:

"Bununla da ilk dəfə YAP-ın təşəbbüsü ilə Azərbyacanda parlamentin buraxılması və yeni seçkinin keçirilməsi reallaşacaq. Parlamentin buraxılması, növbədənkənar seçki keçirilməsi dünya ölkələrində tez-tez rast gəlinən haldır. Burada qeyri-adi nəsə axtarmağa ehtiyac yoxdur. Söhbət Azərbyacanın bütün həyatını əhatə edən yeniləşmə sferasının genişlənməsindən, bunun nəticəsində ölkənin daha sürətli inkişafından gedir. Güman edirəm ki, parlament bu qərarı dəstəkləyəcək".