Ölkəmizdə sanitariya-gigiyena qaydalarının təmin olunması istiqamətində profilaktik tədbirlər davam etdirilir.
Daxili İşlər Nazirliyinin (DİN) mətbuat xidmətindən xezerxeber.az-a verilən məlumata görə, nazirliyin Baş İctimai Təhlükəsizlik İdarəsinin və Ekologiya və Təbii Sərvətlər Nazirliyinin əməkdaşları tərəfindən sanitariya-gigiyena qaydalarının pozulması hallarının qarşısının alınması məqsədilə ətraf mühitin mühafizəsinə nəzarət artırılıb.
Belə ki, aprelin 16-da Binəqədi rayonunun M.Ə.Rəsulzadə qəsəbəsi ərazisində məişət və digər qarışıq tulantıların qalaqlanması aşkarlanıb. Keçirilən müvafiq tədbirlər nəticəsində ətraf mühitin mühafizəsinə məsul olan vəzifəli şəxs müəyyən olunub. İnzibati Xətalar Məcəlləsinin 541-ci (ətraf mühitin mühafizəsinə nəzarəti həyata keçirən müvafiq icra hakimiyyəti orqanının tələblərinin yerinə yetirilməməsi) maddəsinin tələblərini pozduğuna görə qəsəbə bələdiyyəsinin sədri H.Hüseynova 3 min manat məbləğində inzibati tənbeh tədbiri tətbiq edilib.
DİN qeyd olunan hallarla bağlı diqqətə çatdırır ki, Daxili İşlər Nazirliyinin əməkdaşları hansısa vətəndaşın məsuliyyətə cəlb edilməsində maraqlı deyil. Əsas məqsəd hər bir şəxsin üzərinə düşən vəzifədən irəli gələrək hüquq qaydasına əməl etməsindən, digər şəxslərin hüquqlarına hörmətlə yanaşmasından, ictimai qaydanın qorumasına töhfəsini verməsindən ibarətdir.