Polis üç rayonda əməliyyat keçirdi: Həbs olunanlar var

Qubada silah-sursatın aşkar olunması ilə bağlı əməliyyat keçirilib.

Quba rayon polis şöbəsi əməkdaşlarının keçirdikləri əməliyyat tədbiri nəticəsində Cimi kəndi ərazisində kənd sakini Q.Mirzəyev saxlanılıb.

Ondan müvafiq sənədləri olmayan "BUM” markalı ov tüfəngi götürülüb.

Bundan başqa, Neftçala rayon polis şöbəsi əməkdaşlarının daxil olmuş məlumat əsasında keçirdikləri əməliyyat tədbiri nəticəsində Bankə qəsəbə sakini A.Məmmədovdan "LLAMA” markalı tapança və 1 ədəd patron darağı aşkar olunub.

Oxşar əməliyyat Kürdəmir rayonunda da keçirilib.

Kürdəmir rayon polis şöbəsi əməkdaşlarının daxil olmuş məlumat əsasında keçirdikləri əməliyyat tədbiri nəticəsində Carlı kənd sakini X.Abdullayevdən müvafiq sənədləri olmayan "TOZ-12” markalı ov tüfəngi götürülüb.

Bütün faktlarla bağlı araşdırma aparılır.