Almaniyanın
Şlezviq-Qolştayn əyalətinin baş prokurorluğu Kataloniyanın sabiq lideri
Karlos Puçdemonu İspaniyaya ekstradisiya edəcək. Bu barədə "N-TV” prokurorluğun nümayəndəsinə istinadən məlumat yayıb.
"Bu
qərar, İspaniya hökumətinin ekstradisiya barədə sorğusunun yoxlanılması
nəticəsində verilib” – deyə prokurorluğun nümayəndəsi bildirib.
Hələ
1 ay bundan əvvəl Almaniya məhkəməsi Puçdemonun ekstradisiyasi ilə
bağlı ispan hökumətinin xahişini rədd etmişdi. Səbəb kimi isə,
Kataloniyanın müstəqillik kampaniyasındakı başlıca roluna görə, İspaniya
dövləti əleyhinə üsyanda ittiham edilməsi idi. Bununla belə, məhkəmə
Puçdemonun nisbətən az ağır ittiham - dövlət fondlarının mənimsənilməsi
üzrə ekstradisiyasına razı ola biləcəyini demişdi. Bu isə Madridi qane
etməyib.
İndi isə Almaniya Baş Prokurorluğu İspaniya
hökumətindən aldığı yeni informasiyadan, məsələn, polisə qarşı
zorakılığın əks olunduğu videolardan belə qənaətə gəlib ki, Puçdemonun
dövlətə qarşı üsyanda ittiham edilməsi yetərincə əsaslandırılıb. Bu
səbəbdən Baş prokurorluq Puçdemonun ekstradisiya oluna biləcəyinə dair
bəyanat verəcək.
Alman prokurorları həmçinin, ekstradisiyaya
qədər Puçdemonun həbs altına alınması üçün məhkəməyə müraciət ediblər.
Məhkəmənin ekstradisiya qərarını nə zaman verəcəyi isə bəlli deyil.
Xatırladaq
ki, Kataloniyanın İspanyadan ayrılıb müstəqil dövlət olması üçün muxtar
regionun lideri Karlos Puçdemonun qərarı ilə ötən il oktyabrın 1-də
referendum keçirilib. İspaniya mərkəzi hökuməti bunun konstitusiyaya
zidd olduğunu deyərək, prosesə mane olmağa çalışıb və referendumun
nəticələrini tanımayıb. Baş nazir Mariano Raxoy Puçdemonu Kataloniyanın
rəhbəri vəzifəsindən kənarlaşdırıb. Dövlətə qarşı qiyamda ittiham olunan
Puçdemon həbsdən yaxa qurtarmaq üçün oktyabrın sonunda Belçikaya,
oradan isə bu ilin martında Almaniyaya qaçıb. Almaniyada əvvəlcə həbs
olunsa da, ölkə ərazisini tərk etməmək şərti altında zaminlə azadlığa
buraxılıb. /azvision.az