Xarici işlər naziri
Elmar Məmmədyarov BMT Baş məclisinin 72-ci sessiyası çərçivəsində
ATƏT-in Minsk Qrupunun həmsədrləri İqor Popov (Rusiya Federasiyası),
Stefan Viskonti (Fransa), Əndrü Sxofer (ABŞ) və ATƏT-in Fəaliyyətdə olan
sədrinin şəxsi nümayəndəsi Anjey Kaspişikin iştirakı ilə Ermənistan
xarici işlər naziri Edvard Nalbandyanla görüşüb.
Azərbaycan XİN-nin Mətbuat Xidmətindən
XəzərXəbər-ə verilən xəbərə görə, görüşdə Ermənistan-Azərbaycan Dağlıq Qarabağ münaqişəsinin həlli üzrə ətraflı fikir mübadiləsi aparılıb. Bununla bağlı Ermənistan, Azərbaycan və həmsədrlər tərəfindən atılmalı olan addımlar nəzərdən keçirilib.
Görüş əsnasında ATƏT-in Minsk Qrupunun həmsədrlərinin təklifinə uyğun olaraq Ermənistan və Azərbaycan prezidentlərinin görüşünün keçirilməsi ilə əlaqədar məsələlər müzakirə olunub.
Nazir
Elmar Məmmədyarov münaqişənin həlli üzrə substantiv danışıqların davam
etdirilməsi üçün həmsədrlər tərəfindən səsləndirilən bir sıra maraqlı
təkliflərin Azərbaycan tərəfindən dəstəkləndiyini bildirib.
Həmçinin, Elmar Məmmədyarov münaqişənin tezliklə həllinə nail olmaq üçün Azərbaycanın məntiqli danışıqlara daim hazır olduğunu bir daha vurğulayıb.
***
Nyu-Yorkda Azərbaycan və Ermənistanın xarici işlər nazirləri Elmar Məmmədyarovla Edvard Nalbandyanın görüşü başlayıb. Bu barədə Azərbaycan XİN-in mətbuat xidmətinin rəhbəri Hikmət Hacıyev "Twitter" səhifəsində yazıb.
Görüşdə ATƏT-in Minsk Qrupunun həmsədrləri də iştirak edirlər.
XİN rəsmisi bildirib ki, görüşdə Dağlıq Qarabağ münaqişəsinin həlli yolları müzakirə edilir.