Xəzər Xəbər

Dollar sürətlə bahalaşır: Manatı nə gözləyir? VİDEO

Veb TV | 1,619 | 19:59 • 16 May 2022
Dollar sürətlə bahalaşır: Manatı nə gözləyir?

Təqribən bir ildən artıq idi ki, qardaş ölkə Türkiyənin milli valyutası iqtisadi təlatümlər yaşayırdı. Hökumətin atdığı bəzi addımlardan sonra qismən sabitlənən lirə son bir ayda yenidən dəyər itirməyə başlayıb. Avrozonanın vahid valyutası avro isə artıq 4 aydır ucuzlaşma tempini dayandıra bilmir. İqtisadçılar deyirlər ki, dollar bütün dünyada bahalaşsa da, Azərbaycan manatı dayanıqlılığını davam etdirə biləcək. 

Türk lirəsi son günlər yenidən dəyər itirməyə başlayıb. Qardaş ölkənin milli valyutası 1 dollar qarşılığında təqribən 16 lirəyə bərabər olub. Halbuki son həftələrə qədər bu rəqəm 14 lirə ətrafında idi..

Azərbaycanın ticarət əməliyyatlarında daha bir mühüm yer tutan valyutanın - avronun ucuzlaşma tempi də davam edir. İndi 1 avro 1 dollar 4 sent və ya 1 manat 76 qəpiyə təklif edilir. İqtisadçı ekspert Fuad İbrahimov deyir ki, əslində ABŞ Federal Ehtiyatlar Sistemi dolların uçot dərəcəsini artırdıqdan sonra, bu, dünyanın bir çox dövlətlərinin milli valyutalarına təsir etdi. O ki qaldı, türk milli valyutasının ucuzlaşmasına, bunun üçün əlavə yeni faktorlar ortaya çıxmasa da, avrozonanın vahid valyutasının dəyər itirmə səbəbləri aydın görünür. Avropa fevral ayından etibarən, xüsusən Rusiya-Ukrayna savaşından bəri ticarət əməliyyatlarında mənfi saldoya düşüb. 

İqtisadçı ekspert deyir ki, həm avrozona ilə, həm də qardaş ölkə Türkiyə ilə Azərbaycanın sıx ixrac-idxal əməliyyatları var və bu regional iqtisadi hadisələr Azərbaycan iqtisadiyyatı üçün əhəmiyyət kəsb edir. Lakin avro və lirənin ucuzlaşdığı ərəfədə Azərbaycanın göstərdiyi makroiqtisadi göstəricilər bütün mümkün təzyiqləri aradan qaldırıb. 

Qeyd edək ki, son iki ayda Azərbaycanın Mərkəzi Bankının valyuta ehtiyatlarında cüzi azalma qeydə alınır. Ekspertin fikrincə, manatın möhkəmliyinin zəmanəti olan valyuta ehtiyatlarında baş verən bu azalma isə manata təhlükə yaratmır. 

 

Xəbər lenti

Çox oxunanlar