Xəzər Xəbər

Şabran və Qəbələdə yanğının söndürülməsinə 2 helikopter cəlb olunub

Region | 18:18 • 15 Avqust 2022
Şabran və Qəbələdə yanğının söndürülməsinə 2 helikopter cəlb olunub

Fövqəladə Hallar Nazirliyi (FHN) Şabran və Qəbələdə baş verən yanğınlar barədə məlumat yayıb.

FHN-dən xezerxeber.az-a verilən xəbərə görə, nazirliyə Şabran rayonunun Xəlfələr kəndi və Qəbələ rayonunun Abrıx, Tikanlı kəndləri yaxınlığında dağlıq ərazidə yanğın olması barədə məlumat daxil olub. Məlumatla əlaqədar dərhal FHN-in Dövlət Yanğından Mühafizə Xidmətinin yanğından mühafizə bölmələri çağırış üzrə cəlb olunub.

Relyefin mürəkkəbliyi və havanın küləkli olması yanğınsöndürmə işlərini çətinləşdirir. Yanğınsöndürmə işlərini sürətləndirmək və yanğınların daha geniş əraziyə yayılmasının qarşısını almaq məqsədi ilə hər iki əraziyə Fövqəladə Hallar Nazirliyindən əlavə qüvvələr, o cümlədən Aviasiya dəstəsinin iki helikopteri, həmçinin Ekologiya və Təbii Sərvətlər Nazirliyinin Meşə Təsərrüfatı Mərkəzinin əməkdaşları cəlb olunub. Hazırda yanğınsöndürmə işləri davam etdirilir.

Xəbər lenti