İsrailin Suriyadakı İran konsulluğuna hücumu zamanı yeddi nəfər ölüb YENİLƏNİB

SEPAH 7 üzvünün İsrailin Suriyadakı İran konsulluğuna hücumda öldüyünü təsdiqləyib.

Bu barədə İran İslam İnqilabı Keşikçiləri Korpusunun Ümumi ictimaiyyətlə əlaqələr idarəsi bəyanat yayıb.

Bildirilib ki, Məhəmməd Rza Zahedi, Məhəmməd Hadi Hacı Rəhimi və digər 5 SEPAH üzvü İsrailin İran İslam Respublikasının Dəməşqdəki konsulluğuna raket hücumu nəticəsində ölüb. (APA)

20:46

İsrail Hərbi Hava Qüvvələrinin raketinin Suriya paytaxtının qərbində, İran səfirliyi və konsulluğunun yerləşdiyi Mezze məhəlləsini vurması nəticəsində azı 6 nəfər həlak olub. Telekanalın məlumatına görə, ölənlərdən biri İslam İnqilabı Keşikçiləri Korpusunun (SEPAH) yüksək rütbəli generalı Məhəmməd Rza Zahididir. Hadisə yerinə yanğınsöndürmə briqadaları gəlib.

Xezerxeber.az xəbər verir ki, bu barədə “Al Hadath” telekanalı məlumat yayıb.

Telekanalın məlumatına görə, raketlərdən biri Livan və Fələstin təşkilatlarının nümayəndələri ilə görüşlər üçün istifadə edilən villaya düşüb. İran səfiri hadisə yerində olub, lakin xəsarət almayıb.

İranın diplomatik missiya kompleksinin yaxınlığında İslam İnqilabı Keşikçiləri Korpusunun (İran Silahlı Qüvvələrinin elit bölmələri) hərbi məsləhətçilərinin yaşadığı villalar var. “Al Hadath” hücumun hədəfinin Suriyada yerləşən İran zabitlərindən biri ola biləcəyini ehtimal edir.

Xatırladaq ki, yanvarın 20-də eyni şəraitdə İslam İnqilabı Keşikçiləri Korpusunun Əl-Qüds xüsusi təyinatlı qüvvələrinin kəşfiyyat xidmətinin komandiri, general Yusuf Omid Zadə Dəməşqdə öldürülüb. Daha sonra hücumda 3 təyyarə iştirak edib, məsləhətçilərin yaşadığı dördmərtəbəli ev tamamilə dağıdılıb.