Qeydiyyatda olan QİÇS xəstələrinin sayı açıqlanıb

Azərbaycanda ilk dəfə 1987-ci ildə İİV infeksiyasına yoluxma halı aşkarlanıb.

Xezerxeber.az xəbər verir ki, bunu Ümumdünya QİÇS-lə Mübarizə Gününə həsr edilmiş dəyirmi masada Səhiyyə Nazirliyi Respublika QİÇS-lə Mübarizə Mərkəzinin direktoru Famil Məmmədov deyib.

“Hazırda Respublika QİÇS-lə Mübarizə Mərkəzində 8 min 500 nəfər rəsmi qeydiyyatdadır. Onlardan 5 min 903-ü kişi, 2 min 597- qadındır. QİÇS mərhələsində olan Azərbaycan vətəndaşlarının sayı 1993 nəfər, İİV infeksiyasından dünyasını dəyişən Azərbaycan vətəndaşlarının sayı isə 1237 nəfərdir”.

F.Məmmədov qeyd edib ki, Səhiyyə Nazirliyi tərəfindən İİV-lə yaşayan insanlara profilaktika, müalicə, qulluq və dəstəyin göstərilməsinin təmin edilməsi işi, əvvəlki illərdə olduğu kimi, Respublika QiÇS-lə Mübarizə Mərkəzi tərəfindən davam etdirilir. Belə ki, 2006-cı ildən tətbiq edilən antiretroviral terapiyaya hazırda 7 min 778 İİV-lə yaşayan insan cəlb olunub.