Dostlar, yeni bir dələduzluq metodu var. Əslində, dünyada yeni deyil, illərdir var, amma müşahidələrim və aşkarladığım hadisələr göstərir ki, bizim bazarda bu metod artmağa başlayıb. Xüsusən "facebook" qruplarında açıq bazar gedir".
Xezerxeber.az xəbər verir ki, bu fikirləri texnobloger Fərid Pərdəşünas qeyd edib.
O bildirib ki, bəzi işbazlar və telefon satıcıları xaricdən gələn telefonların ucuz qiymətə IMEI qeydiyyatını aparırlar: "Bu, birbaşa IMEI klonlaması vasitəsilə həyata keçirilir. Əslində, hazırda əlinizdə olan cihaz klonlanmış bir IMEI koduna da sahib ola bilər. Bu metodla işbazlar başqa cihazların və yaxud hazırda aktiv olan başqasına məxsus smartfonların IMEI kodlarını yeni gələn cihazlara klonlayıb satırlar. Nəticə necə olur? Əgər siz klonlanmış bir cihaz daşıyıcısınızsa, bu sizin üçün real təhlükəlidir".
Onun sözlərinə görə, IMEI qeydiyyatları dövlətlər aparır və hər bir IMEI kodu cihaz vasitəsilə GSM danışıqlarının həyata keçirilməsi üçün cihazın kimlik kartı hesab edilir.
"Çalışın bu kodu başqaları ilə bölüşməyin. Azərbaycanda cihazlarınızın qeydiyyatını və yoxlanışını imei.az saytı vasitəsilə həyata keçirə bilərsiniz. Əgər kimsə sizə daha ucuz qeydiyyat deyirsə, bilin ki, IMEI klonlayacaq. Bu, sonrakı mərhələdə sizin də, onun da başını ağrıdacaq".