Valideynlər DİQQƏTLİ OLSUNLAR - Hər yaşda uşaqda koronavirus aşkarlana bilər

 

Bu sözləri açıqlamasında pediatr Aytən Cavadova deyib. Həkimin sözlərinə görə, son vaxtlar uşaqlarda koronavirusa  yoluxmada ağırlaşmalar daha çox müşahidə edilir:

 

"Bəzən valideynlər məsuliyyətsizlik edirlər. Düşünürlər ki, onsuz da uşaqlar virusa yoluxmur və xəstəliyi ağır keçirmirlər. Lakin ilk növbədə düşünmək lazımdır ki, uşaq virusa yoluxarsa, hər şeydən qabaq o, daşıyıcı olur və bunun da ağır nəticələri ola bilər. Bundan başqa, hər yaşda uşaq koronavirusa yoluxa bilər. Bu baxımdan uşaqlara sosial məsafəni qorumağı, maskadan istifadəni öyrətmək lazımdır.

Pediatr Sevda Namazova isə uşaqların qapalı məkanda maskanı çıxarmamalı olduğunu deyib:

 

"Hazırda uşaqlarda ən çox kəskin respirator virus xəstəlikləridir. Lakin kolleqalarımla söhbət əsnasında bildirirlər ki, koronavirusa yoluxan pasientləri olur. Hətta bu yaxınlarda 5 aylıq körpədə belə virus aşkarlandı və müalicə proseduru tətbiq edildi. Maskaların tez-tez dəyişdirilməsi ilə bağlı məsələ hamıya aydındır. Lakin çox vaxt görürük ki, uşaq da, valideyni də günlərlə eyni maskadan istifadə edir. Uşaqlar 4-6 qat maskadan istifadə edib, 4 saatdan bir maskanı yeniləməlidirlər. Məktəb və bağçalarda yuxarı tənəffüs orqanlarının infeksiyaları o qədər yayılıb ki, hazırda maskadan istifadə etmədən otaqda oturmaq doğru olmaz və problem yarada bilər.