Xəzər Xəbər

AQTA-dan qanunsuz heyvan kəsimi ilə bağlı XƏBƏRDARLIQ

Cəmiyyət | 12:57 • 6 May 2021
AQTA-dan qanunsuz heyvan kəsimi ilə bağlı XƏBƏRDARLIQ

Son vaxtlar aparılan monitorinqlərin nəticələri göstərir ki, görülən işlərə baxmayaraq, baytarlıq-sanitariya və sanitariya-gigiyena normalarına cavab verməyən ərazilərdə, küçələrdə, yol kənarlarında satış məqsədilə qanunsuz heyvan kəsimi fəaliyyətləri davam edir.

Azərbaycan Qida Təhlükəsizliyi Agentliyindən XəzərXəbər-ə verilən məlumata görə, bəzi ərazilərdə isə bu cür qanunsuz halların genişləndiyi müəyyənləşdirilib. 

Qeyd edilir ki, dünyada yayılmış koronavirus (COVID-19) pandemiyası dövründə, o cümlədən havaların mövsümi istiləşməsi ilə əlaqədar kütləvi zoonoz xəstəliklərin yayılması riski mövcuddur: 

“Belə bir şəraitdə baytarlıq-sanitariya və sanitariya-gigiyena normalarına cavab verməyən yerlərdə heyvanların baytarlıq nəzarətindən keçirilmədən kəsilməsi təhlükəli vəziyyətin yaranmasına səbəb ola bilər. Bununla əlaqədar, Agentlik tərəfindən aparılan monitorinqlər zamanı yerlərdə qanunsuz heyvan kəsimi fəaliyyətləri ilə bağlı aşkar olunan faktlar üzrə məlumatlar toplanılıb və müvafiq tədbirlərin görülməsi üçün yerli icra hakimiyyəti orqanlarına göndərilib”.

Qida Təhlükəsizliyi Agentliyi nəzarət orqanı olaraq baş verə biləcək bioloji təhlükə riskini mütəmadi olaraq qiymətləndirir, məsələni daim diqqət mərkəzində saxlayır, qabaqlayıcı tədbirlərin həyata keçirilməsi üçün əhali arasında geniş maarifləndirmə, təbliğat və təşviqat işlərini həyata keçirir.

Xəbər lenti