Sumqayıtda partlayış baş verən binanın sakinləri evlərinə qayıtmaq istəyirlər VİDEO

Sumqayıtda partlayış baş verən binanın bəzi sakinləri onlara yardım edilməməsindən şikayətçidirlər. Onlar həmçinin evlərinə qayıtmaq istəyirlər. 

Xezerxeber.az xatırladır ki, ötən il dekabrın 3-də Sumqayıtın 13-cü mikrorayon ərazisində partlayış baş vermişdi. Bina sakinləri isə təhlükəsizlik səbəbilə kirayə haqqı ödənilərək başqa ərazilərə köçürülmüşdür. Lakin hadisədən 6 ay keçməsinə baxmayaraq, 35 ailədən yalnız 15-nə maddi yardım verilib. Digər ailələr isə hələ də kömək gözləyir.

Partlayışın yaratdığı çətinliklər ailələri çarəsiz vəziyyətdə qoyub. Onlar 6 ayın tamamında mənzillərinə qayıda bilməyəcəklərindən narahatdırlar. 

Sumqayıt Şəhər İcra Hakimiyyətindən "Xəzər Xəbər"ə bildirildi ki, binanın yararsız olan girişi söküləcək. O da qeyd olundu ki, partlayış baş verən bina 6 girişdən ibarətdir. Hazırda binanın birinci girişində yaşayan sakinlər müvəqqəti olaraq kirayə mənzillərlə təmin olunublar. Həmin ailələrin hər birinə 6 aylıq kirayə xərcləri ödənilib.   

Xezerxeber.az mövzu ilə bağlı daha ətraflı videomaterialı təqdim edir.