Xəzər Xəbər

İşğaldan azad olunmuş ərazilərdə yeni inkişaf modeli qurulacaq

İqtisadiyyat | 10:30 • 19 Yanvar 2021
İşğaldan azad olunmuş ərazilərdə yeni inkişaf modeli qurulacaq

İşğaldan azad olunan torpaqlarımızda yeni inkişaf modeli qurulacaq. Azərbaycan Prezidenti cənab İlham Əliyev Sumqayıt Kimya Sənaye Parkında çıxışı zamanı bildirib ki, "azad edilmiş torpaqlarda hər şey demək olar ki, dağıdılıb. Ona görə biz elə bir inkişaf modeli qurmalıyıq ki, ondan sonra biz onu bütün başqa torpaqlara da, necə deyərlər, transfer edə bilək, mövcud qüsurlar aradan qalxsın və ölkəmizin uğurlu inkişafı təmin edilsin”.Göründüyü kimi, işğaldan azad olunan torpaqlarımızda yaradılacaq inkişaf modeli həm beynəlxalq standartlar çərçivəsində infrastrukturun formalaşması, həm də iqtisadi menecmentin müasir çağrışlara uyğun qurulmasını özündə ehtiva edəcək. 


Xezerxeber.az xəbər verir ki, bunu iqtisadçı alim, millət vəkili Vüqar Bayramov qeyd edib. 


O bildirib ki, artıq müasir standartlara uyğun beynəlxalq hava limanı, yollar və bir sıra digər infrastrukturun formalaşması istiqamətində işlər başlayıb. Bu eyni zamanda, iqtisadi idarəetmə baxımdan da yeni modelin formalaşması anlamına gəlir. Bu model isə cənab Prezidentin qeyd etdiyi kimi növbəti mərhələdə digər ərazilərimizə transfer ediəcək: "İqtisad potensial baxımdan qeyd etmək lazımdır ki, 2019-cu ildə Yuxarı Qarabağ iqtisadi rayonu 637 milyon 70 min manat, o cümlədən Ağdam 172 milyon 934 min manat, Füzuli 138 milyon 652 min manatlıq məhsul istehsal edib. Dörd rayonu əhatə edən Kəlbəcər-Laçın iqtisadi rayonunda isə cəmi 97 milyon 838 min manatlıq məhsul istehsal olunub. Yeddi rayonumuzun cəmləşdiyi Yuxarı Qarabağın ölkə iqtisadiyyatının əsas sahələri üzrə məhsul buraxılışında xüsusi çəkisi 0,7 faiz, Kəlbəcər-Laçın iqtisadi rayonunun isə cəmi 0,1 faizdir. Bu o deməkdir ki, uzun müddət işğal altında qalan ərazilərimizin ümumi iqtisadiyyatda payı tam rəqəmli deyil və 27 ildən çox davam edən erməni işğalı nəticəsində böyük iqtisadi potensialdan faydalanmaq mümkün olmayıb".


V.Bayramov qeyd edib ki, yeni model formalaşandan sonra işğaldan azad olunmuş ərazilərimiz ölkədə iqtisadi inkişafın əsas drayverlərindən birinə çevriləcək.

Rubrikanın digər xəbərləri

Xəbər lenti