Nazir müavini: Şəhid ailələri qısa müddətdə çox gözəl evlərlə təmin ediləcək

Əmək və əhalinin sosial müdafiəsi nazirinin müavini Anar Kərimov şəhid ailələrinə mənzillərin nə vaxt veriləcəyi məsələsinə aydınlıq gətirib.

Xezerxeber.az-ın məlumatına görə, nazir müavini bildirib ki, hazırda bu məsələ ilə bağlı bir neçə istiqamətdə dəqiqləşmə aparılır. 

Onun sözlərinə görə, birinci Qarabağ müharibəsində şəhid ailələrinə mənzillərin verilməsi hazırda növbəli şəkildə davam edir. Vətən müharibəsindən əvvəl onlarla bağlı proqram nəzərdə tutulmuşdu: "Vətən müharibəsi bitəndən sonra hazırda həmin kontingentdən olan ailələr də dəqiqləşdirilir. Mənzillərin hansı mərhələdə verilməsi ilə bağlı yəqin ki, yanvarda proqram təsdiq olunacaq. Burada maliyyə yükü, rəqəmlərlə bağlı dəqiqləşmələr aparılır. Əminəm ki, həm birinci Qarabağ müharibəsi, həm də Vətən müharibəsindən olan şəhid ailələri qısa müddətdə çox gözəl evlərlə əhatə olunacaq".