Bakıda qadın sığınacağına hücum: Xəsarət alan var

Daxili İşlər Nazirliyi (DİN) "Təmiz Dünya" Qadınlara Yardım İctimai Birliyinin (İB) əməkdaşının döyülməsi ilə bağlı məlumat yayıb.

DİN-in Mətbuat Xidmətinin şöbə rəisi, polis mayoru Elşad Hacıyev bildirib ki, sığınacaqdan daxil olan çağırış üzrə polis hadisə yerinə cəlb olunub, hazırda araşdırma aparılır.

İlkin məlumata görə, hadisə ailə-məişət zəminində baş verib.

***

Bakıda qadın və uşaq sığınacağına hücum olub.

"Report"un xəbərinə görə, bu barədə "Təmiz Dünya” Qadınlara Yardım İctimai Birliyinin sədri Mehriban Zeynalova məlumat verib.

O bildirib ki, sığınacağın əməkdaşları sığınacaqda qalan qadının qohumları tərəfindən zorakılığa məruz qalıb. Həmçinin sığınacağın qadın əməkdaşına da xəsarət yetirilib:

"Qadının əri Primov Habil, qayınanası Primova Saniyyət, baldızı Xəyalə sığınacağa gələrək xanım əməkdaşlarımıza çox ciddi xəsarətlər yetiriblər. Daxili İşlər Nazirliyindən xahiş edirik ki, bu ailə haqqında tədbir görülsün. Artıq polisə məlumat verilib".