Xəzər Xəbər

Elektronika mağazasından oğurluq edən şəxs saxlanıldı - Foto

Hadisə | 11:01 • 4 Dekabr 2020
Elektronika  mağazasından oğurluq edən şəxs saxlanıldı -

Bakıda elektronik əşyalarının satıldığı mağazalardan oğurluqlar edən şəxs saxlanılıb.


Daxili İşlər Nazirliyindən Xezerxeber.az-a verilən məlumata Bakının Binəqədi rayonunda yerləşən "Baku Elektronics” mağazasından dəyəri 4599 manat olan noutbuk naməlum şəxs tərəfindən oğurlanıb. Məlumat daxil olan kimi Binəqədi Rayon Polis İdarəsinin 5-ci Polis Bölməsinin əməkdaşları tərəfindən oğurluq edən şəxsin axtarışlarına başlanılıb. Əməliyyat nəticəsində hadisəni törətməkdə şübhəli bilinən əvvəllər məhkum olunmuş paytaxt sakini Nicat Qasımov saxlanılıb. Polis Bölməsində araşdırma aparılan zaman onun Nəsimi rayonunda da oğurluq etdiyi üçün Cinayət Məcəlləsinin 177-ci (oğurluq) maddəsi ilə axtarışda olduğu müəyyən edilib.

Qeyd edək ki, Nicat Qasımov ifadəsində ayrı-ayrı vaxtlarda paytaxtın müxtəlif rayonlarında yerləşən "Baku Elektronics” və "Kontakt Home” mağazalarından ümumilikdə 6 dəfə oğurluq etdiyini etiraf edib. O, oğurladığı telefon və noutbukları isə satdığını bildirib. Nicat Qasımovun qeyd edilən mağazalardan oğurluq etməsi həmin obyektlərin müşahidə kameraları vasitəsi ilə də lentə alınıb.


Nicat Qasımov barəsində 5-ci Polis Bölməsində toplanan materialları Binəqədi Rayon Polis İdarəsinin İstintaq Şöbəsinə göndərilib. Onun barəsində Cinayət Məcəlləsinin müvafiq maddəsi ilə cinayət işi başlanılıb, araşdırmalar davam etdirilir. Saxlanılan şəxsin əməllərindən zərərçəkən başqa vətəndaşlar varsa bu barədə ərazi üzrə polis idarə, şöbə və bölmələrinə, habelə DİN-in "102” Zəng Mərkəzinə məlumat verə bilərlər.


Sevinc Yasinqızı


Xəbər lenti