Xəzər Xəbər

Coğrafiya İnstitutunda Kür çayının problemləri araşdırılır

Cəmiyyət | 15:04 • 6 İyul 2020
Coğrafiya İnstitutunda Kür çayının problemləri araşdırılır

AMEA akademik Həsən Əliyev adına Coğrafiya İnstitutunda Kür çayının problemləri araşdırılır.


Bu barədə AZƏRTAC-a institutun elmi işlər üzrə direktor müavini, dosent Məhərrəm Həsənov məlumat verib. Coğrafiyaçı alim Kür çayında suyun səviyyəsinin aşağı enməsi məsələlərinə aydınlıq gətirib.


Çayda suyun azalmasının səbəblərindən danışan alim bildirib ki, Azərbaycanın su ehtiyatının 70 faizi qonşu ölkələrdə formalaşıb respublika ərazisinə gələn suyun səviyyəsindən asılıdır. 2014-cü ildən başlayaraq son 6 il ərzində Azərbaycana daxil olan Kür suyunun həcmi 25 faiz azalıb. Neftçala, Salyan rayonlarında aparılan tədqiqatlar zamanı 60 kilometr ərazidə Xəzərin Kürə qarışdığı müşahidə edilib. Bu səbəbdən sakinlər şirin su qıtlığından əziyyət çəkirlər.


Alim yaranmış vəziyyəti düzəltmək üçün təcili olaraq Kürün deltasını Xəzər dənizinə qovuşan yerdə asılı materiallardan və gildən təmizləməyin vacib olduğunu vurğulayıb. O qeyd edib ki, əks təqdirdə, Kürün suyu artarsa, bu, daşqınlara səbəb ola bilər. M.Həsənov bildirib ki, qlobal istiləşmə ilə əlaqədar buxarlanmanın artması, buzlaqların, eləcə də yağıntıların azalması Kürdə suyun səviyyəsini aşağı salan səbəblərdəndir. O, həmçinin istifadə olunmuş suyun təmizləndikdən sonra dənizə axıdılmasını israfçılıq hesab edərək onun təkrar emalını məqsədəuyğun hesab edib.

Xəbər lenti