190 manat birdəfəlik ödənişi ala bilməyənlər - VİDEO

Yevlax sakini Ramil Hüseynov 190 manat birdəfəlik ödənişi ala bilmir. O, həmin məbləğ üçün müraciət etsə də, ona VÖEN-in aktiv olduğu bildirilib və imtina verilib. Ona görə də Yevlax sakini yerli vergi xidmətinə gedib və VÖEN-in dondurulması haqda sənəd alıb. Ancaq yenə də ona birdəfəlik ödəmə şamil olunmayıb.

Xezerxeber.az-ın məlumatına görə, Ramil Hüseynov 6 il əvvəl taksi fəaliyyətinə görə VÖEN açdırdığını və bir neçə il öncə hesabı dondurduğunu deyir. Bununla bağlı Məşğulluq Xidmətinə təqdim etdiyi sənədin də bir nəticə verməməsi onu çıxılmaz vəziyyətdə qoyub.

Bənzər hadisə Qazax rayon sakini Səbinə Mustafayevanın da başına gəlib. VÖEN-i olan qadın aprel ayının 9-u onu dondurub. Bundan sonra isə ayın 16-sı e-sosial.az portalından qeydiyyatdan keçib. Amma ona gələn mesajda VÖEN-i olduğu üçün bu xidmətdən yararlana bilməyəcəyi qeyd edilib.

Gəncə şəhər sakini Mətanət Məmmədova isə pensiya almadığı halda, ona gələn SMS-də onun pensiya aldığı üçün 190 manat ödənişdən faydalana bilməyəcəyi qeyd edilib.

Qismət Məmmədovun sözlərinə görə, onun yoldaşına atasızlığa görə bir müddət pensiya verilib. O da artıq 1 ildən çoxdur ki, dayandırılıb.

Qeyd edək ki, bir müddət əvvəl Dövlət Vergi Xidmətindən bildirilib ki, VÖEN-i dondurulan şəxslər 190 manat birdəfəlik ödənişi ala bilərlər.

Məsələ ilə bağlı Əmək və Əhalinin Sosial Müdafiəsi Nazirliyindən isə bildirilib ki, əgər vətəndaşın VÖEN-i vergilər idarəsinin sistemində aktiv şəkildə görünürsə, bu zaman ona hər hansı bir müavinət düşə bilməz. Amma bununla bərabər məsələlərin hər biri yenidən araşdırılacaq və bundan sonra problemin nə ilə əlaqədar olduğu aydınlaşdırılacaq.

Xezerxeber.az mövzu ilə bağlı daha ətraflı videomaterialı təqdim edir: